Økonomidirektør

Havforskningsinstituttet søkjer økonomidirektør

Om stillinga

Vi har store ambisjonar for framtidas havforsking. God økonomistyring er sentralt for at vi skal få mest mogleg havforsking for pengane.

Havforskingsinstituttet har 1100 tilsette og ein omsetnad på 1,7 milliardar kroner. Vi er organisert i ei matrise med tverrfaglege forskings- og rådgivingsprogram. Til nyoppretta økonomiavdeling søkjer vi etter økonomidirektør. Avdelinga vil bestå av tre seksjonar og økonomidirektør vil få personalansvar for seksjonsleiarane. Stillinga som økonomidirektør inngår i leiargruppa og rapporterer til direktør.

Vi ser etter ein leiar som kan vidareutvikle økonomi- og verksemdsstyringa vår. Du må kjenna verdien av god styringsinformasjon og bidra aktivt til dei viktige avgjerdene som ligg framom oss.

God strategisk forståing og høg gjennomføringsevne er ein føresetnad for stillinga. Du er opptatt av å byggje ein kultur prega av samarbeid, openheit og kunnskap. Det betyr at du er fagleg trygg og liker å formidle faget ditt. Den vi søkjer kommuniserer godt både internt i organisasjonen og med eigardepartementet vårt NFD, andre offentlege myndigheiter og eksterne samarbeidspartnarar.

Kvalifikasjonar

Som vår nye økonomidirektør har vi følgjande oppgåver og forventningar til deg:

• du er strukturert, effektiv og har god strategisk forståing
• du er ansvarsfull og tillitvekkjande
• du tar ansvar for å utvikle og gjennomføre strukturerte og effektive økonomiske prosessar med vesentleg fokus på verksemdsstyring
• du støttar leiinga med analysar og finansiell rapportering av høg fagleg kvalitet
• du har relevant erfaring og kompetanse innan budsjettering, rapportering, prognosar og indikatorar til bruk som styringsunderlag. 
• Havforskingsinstituttet er pålagt å nytte DFØ som systemleverandør innan lønn og rekneskap. Vår nye økonomidirektør må ha naudsynt innsikt slik at desse systema kan nyttast effektivt i samband med eigne systemløysingar
• du har god forståing for risikostyring og ein effektiv internkontroll 

Instituttet fører rekneskapen i tråd med dei statlege SRS-standardane. Som alle statlege forvaltingsorgan er vi i tillegg også pliktige til å rapportere etter kontantprinsippet. 

Den vi søkjer må ha høgare utdanning frå universitet eller høgskule med relevant fagkrins og brei arbeidserfaring, gjerne både frå offentleg og privat sektor. Relevant leiarerfaring, inkludert personalansvar, er ein klar føremon.

Arbeidsspråket er norsk, og det er krav om god skriftleg og munnleg framstillingsevne. Vi legg til grunn at du også meistrar engelsk på høgt nivå.

Inkludering, mangfald og positiv særbehandling

Havforskingsinstituttet har fokus på mangfald, og vi oppmodar alle kvalifiserte kandidatar til å søkje jobb hos oss, uavhengig av alder, kjønn, funksjonsevne, nasjonalitet eller etnisk bakgrunn. Havforskingsinstituttet er ei IA-bedrift, og vi ønskjer å legge forholda til rette for søkjarar med redusert funksjonsevne.

Dersom det finns kvalifiserte søkjarar med funksjonsnedsetting, hol i CV eller innvandrarbakgrunn, vil vi kalle inn minst éin søkjar i kvar av desse gruppene til intervju. For å bli vurdert som søkjar med rett til positiv særbehandling, må du oppfylle visse krav. Du kan lese meir om krava her.

For å synliggjere at du ønskjer å bli vurdert som søkjar med rett til positiv særbehandling ber vi deg krysse av for dette i jobbportalen når du søkjer.

Vi tilbyr

• arbeid i ein leiande forskingsinstitusjon, med stor samfunnsmessig verdi
• eit spanande og solid fagmiljø
• fleksitidsordning, med sommar- og vintertid
• offentleg tenestepensjonsordning i Statens Pensjonskasse
• bedriftshytter
• bedriftsidrettslag

Ytterlegare informasjon

Arbeidsstad er Bergen. Noko reiseverksemd må påreknast. Andre oppgåver enn dei som er nemnde ovanfor kan bli pålagde ved behov.

Stillinga blir løna i stillingskode 1060 avdelingsdirektør, forventa mellom brutto kr 1 000 000 – 1 200 000 ut frå kvalifikasjonar. Det blir trekt 2 % innskot til Statens pensjonskasse.

Søknad må sendast elektronisk via Jobb Norge. CV, relevante attestar og vitnemål må leggast ved i søknaden.

Vi gjer merksam på at opplysningar om søkjaren kan bli offentleggjorde sjølv om søkjaren ber om ikkje å bli ført opp på søkjarlista. Søkjaren vil bli orientert om dette på førehand.

Nærare opplysningar om stillinga kan du få hos direktør Nils Gunnar Kvamstø på tlf. 412 68 923. Sjå også nettsida vår www.hi.no.

Om Havforskingsinstituttet

Havforskingsinstituttet er eitt av dei største marine forskingsinstitutta i Europa, med vel tusen tilsette og ei rekkje forskingsfasilitetar og laboratorium av høg internasjonal standard. Hovudaktivitetane våre er forsking, rådgjeving og overvaking. Havforskingsinstituttet eig og driv seks forskingsfartøy. Hovudkontoret vårt ligg i Bergen. Vi har også avdeling i Tromsø, og forskingsstasjonar i Matre, Austevoll og Flødevigen.

Havforskingsinstituttet skal vere ein leiande kunnskapsleverandør for å sikre ei bærekraftig forvalting av ressursane i dei marine økosystema, både nasjonalt og internasjonalt, og for heile kjeda frå hav til mat, inkludert det marine miljøet, fiskeernæring og trygg og sunn sjømat.

--------------------------------------------------------
Vennligst referer til DN.no i din søknad.